الهامبورجر
كل الناس بتحب الهامبورجر بس بقى تقليدي اوى فى البيت و حتى لما بنخرج بناكل برضه هامبورجر... عموما جرب الطريقة دى و سلملى على هارديز
اشترى فى الأول نوع هامبورجر بالتوابل ... فيه امريكانا بالتوابل العربية و ده الى انا بفضله بس اى نوع بالتوابل هيقضى الغرض
السر فى الخلطه ... هات جبنه شيدر مدخنه و بتتباع عند اى سوبر ماركت كبير
و انت بتحمر الهامبورجر قبل ما تستوى بحاجه بسيطه حط الجبنه الشيدر عليها عشان تسيح معاها و خلى بالك الجبنه الشيدر المدخنه طعمها قوى جدا يعنى متكترش اوى... و بس حطها بقى فى العيش و عيش حياتك فى الكاتشب و يا سلام لو كاتشب حار ...
و برضه هتدعيلي
و على فكرة ممكن تعمل بالجبنه دى بيض مقلى خرافه حط قطع منها فى البيض و انت بتقليه مع صابع مقطع هوت دوج ... و مش هتقدر تغمض عينك
و فيه برضه وجبة لذيذه ساعات بعملها على الفطار مع بساطتها الشديده
هات رغيف عيش و حط فيه جبنه رومى و اربع شرايح طماطم رفيعين و حطه فى الميكرويف او الفرن او اى حاجه بتسخن....... بيبقى لذيذ جداااااا
و بس خلاص ده الى عندى عايزين نشوف بقى اختراعاتكم
